சீனியர் ஆசிய மல்யுத்த சாம்பியன்ஷிப் போட்டியில் மகளிருக்கான 65 கிலோ பிரிவில் இந்தியாவின் நவ்ஜோத் கெளர் வெள்ளிக்கிழமை தங்கம் வென்றார். இது, ஆசிய சாம்பியன்ஷிப்பில் இந்தியா வெல்லும் முதல் தங்கப் பதக்கமாகும்.

முன்னதாக இறுதிச்சுற்றில் நவ்ஜோத் 9-1 என்ற கணக்கில் ஜப்பானின் மியா இமாயை வீழ்த்தினார்.

இதனிடையே, மகளிருக்கான 62 கிலோ பிரிவில் சாக்ஷி மாலிக் 10-7 என்ற கணக்கில் கஜகஸ்தானின் அயாலைம் காஸைமோவாவை வீழ்த்தி வெண்கலம் வென்றார். இதையடுத்து இப்போட்டியில் இந்தியாவின் பதக்க எண்ணிக்கை 6 (ஒரு தங்கம், ஒரு வெள்ளி, 4 வெண்கலம்) ஆகியுள்ளது.

முன்னதாக இப்போட்டியில் 50 கிலோ பிரிவில் வினேஷ் போகத் வெள்ளியும், 59 கிலோ பிரிவில் சங்கீதா வெண்கலமும் வென்றுள்ளது குறிப்பிடத்தக்கது.